ប្រែសម្រួល៖ តារា
លីយ៉ុង ប្រទេសបារាំង៖ គ្រូបង្វឹកក្លិបម៉េនឆេស្ទ័រ យូណៃធីដ លោក រូបិន អាម៉ូរីម បានការពារអ្នកចាំទីអង់ដ្រេ អូណាណាដែលកំពុងត្រូវបានរិះគន់ បន្ទាប់ពីកំហុសដ៏សំខាន់របស់កីឡាករជនជាតិកាមេរូនរូបនេះនៅក្នុងការប្រកួតដែលក្រុមរបស់គាត់ស្មើ ២-២ ជាមួយក្លិបអូឡាំពិក លីយ៉ុង នៅក្នុងជើងទីមួយនៃវគ្គ៨ក្រុមចុងក្រោយនៃពាន Europa League កាលពីថ្ងៃព្រហស្បតិ៍។

អូណាណាបានអនុញ្ញាតឱ្យបាល់ពីការទាត់បាល់ហ្វ្រីឃីករបស់ធីអាហ្គូ អាល់ម៉ាដា រអិលឆ្លងដៃគាត់នៅក្នុងកីឡដ្ឋាន Groupama ហើយក៏មានកំហុសផងដែរចំពោះការស៊ុតស្មើរបស់រ៉ាយ៉ាន់ ឆែរគី នៅពេលចុងម៉ោងដែលបានបដិសេធជ័យជម្នះរបស់ម៉េនឆេស្ទ័រ យូណៃធីដ។

ចាប់តាំងពីដើមរដូវកាលមុន មិនមានអ្នកចាំទីណាម្នាក់របស់ក្លិបនៅក្នុង Premier League ដែលបានធ្វើកំហុសនាំឱ្យមានការស៊ុតបញ្ចូលទីច្រើនជាងអូណាណាឡើយនៅក្នុងការប្រកួតគ្រប់កម្មវិធី។

លោក អាម៉ូរីម បាននិយាយថា “វាអាចកើតឡើង ប្រសិនបើអ្នកលេងបាល់ទាត់ អ្នកលេងការប្រកួតជាច្រើន អ្នកអាចធ្វើកំហុស។ ប្រសិនបើអ្នកមើលរដូវកាលនេះ ខ្ញុំបានធ្វើកំហុសច្រើនជាងពួកគេក្នុងអំឡុងពេលការប្រកួតចុងក្រោយ និងខែចុងក្រោយទាំងនេះ។”

“បញ្ហាមួយទៀតគឺយើងមានការប្រកួតមួយទៀតដើម្បីផ្លាស់ប្តូរអ្វីៗទាំងអស់ ហើយនោះគួរតែជាការផ្តោតអារម្មណ៍របស់យើង។”

“អ្វីដែលល្អបំផុតគឺត្រូវមើលទៅគ្រាប់បាល់ទាំងអស់ សកម្មភាពទាំងអស់ដែលអង់ដ្រេមានក្នុងការប្រកួត នេះគឺជាវិធីល្អបំផុតដើម្បីជួយកីឡាករណាម្នាក់ គឺការផ្តោតលើការប្រកួត អ្វីដែលបានកើតឡើង អ្វីដែលយើងត្រូវកែលម្អ។”

ទោះយ៉ាងណាក៏ដោយ ម៉េនឆេស្ទ័រ យូណៃធីដ នៅតែមិនទាន់ចាញ់ក្នុងពាន Europa League រដូវកាលនេះ ដោយជាក្រុមតែមួយគត់ដែលធ្វើបានបែបនេះនៅរដូវកាលនេះ បន្ទាប់ពីគ្រាប់បាល់ពីឡេនី យ៉ូរ៉ូ និងចូស្វា ហ្សីកហ្សេ បានដាក់ពួកគេក្នុងគន្លងឈានទៅរកជ័យជម្នះ។

ក្រុមដែលឋិតនៅលំដាប់ទី១៣ នៅក្នុងតារាងពិន្ទុ Premier League នៅតែចូលទៅការប្រកួតជើងទីពីរនៅសប្តាហ៍ក្រោយនៅទីក្រុងម៉ានឆេស្ទ័រ ក្នុងនាមជាក្រុមដែលត្រូវបានគេមើលឃើញថាមានឱកាសច្រើនក្នុងការឈានទៅកាន់វគ្គពាក់កណ្តាលផ្តាច់ព្រ័ត្រ។

លោក អាម៉ូរីម បានបន្ថែមថា “វាគឺជាការប្រកួតដែលគួរឱ្យចាប់អារម្មណ៍។ យើងមានការលំបាកខ្លះនៅពាក់កណ្តាលដំបូងនៃការព្យាយាមសង្កត់ ព្រោះលីយ៉ុងលេងក្នុងរបៀបខុសគ្នា។ បន្ទាប់មក នៅពាក់កណ្តាលនៃពាក់កណ្តាលដំបូង និងជាពិសេសពាក់កណ្តាលទីពីរ យើងបានគ្រប់គ្រងការប្រកួត។”

“ការប្រកួតជើងទីពីរនឹងជាការប្រកួតខុសគ្នា។ នៅឯផ្ទះ អ្នកគាំទ្ររបស់យើងចង់ឱ្យយើងសង្កត់គ្រប់ពេល៕”
ប្រភព៖ រ៉យទ័រ